|
abhee pichley dinon Karachi mein honey walee wardaaton mein logon key mushtael hujoom ney Dakoo'on ko pakar kar tashaddud key baad zinda jala diey....
Pehlee khabar parh kar mujhey khushi bhee hoee aur saath hee Afsos bhee...
khushi is baat par key logon ney apni madad aap ka bera utha kar ittehaad aur yakjehti aur bahaduri ka saboot diya aur dakoo'on sey muqabley key baad unko pakar liya....
yahan tak to theek hey, phir un par tashaddud bhee kiya chalo yeh baat bhee kisi had tak qabil-e-qabool hey magar us key baad un ko police key hawaley karney ki bajaey zinda jala diya??? ji haan Zinda. keya koee tasawwar kar sakta hey keh is amal key peechey keya awamil kar farma rahey hongey keh Awam, yaani aam log is had tak chaley gaey keh unhon ney dakoo'on ko jo keh Insaan hee they sar-e-aam zindah jaladiya aur phir kuch din baad aik aur jagah par yehee waqia dohraya gaya aur is baar bhee Mushtael Awam hee thee.
Merey Khuda !!!
Meree samajh mein to sirf yeh aata hey keh police key hawaley logon ney is liey naheen kiya hoga key sab ko maaloom hey keh police ney do char so rupey laikar unko chorr dena tha jis sey un musallah dakoo'n ki mazeed himmat afzaee hotee aur woh phir kaheen daka daltey aur maasoom logon ki janon sey khailtey......
doosree baat karachi mein hazaron lakhon din deharey logon ko sar-e-bazaar loota gaya mobile cheenna to ab aam see baat ho kar reh gayee hey magar sirf aik mobile ki khatir pata naheen kitney log apnee janon sey haath dho baithey......
Police ney keya kiya? kisi bhee Nazim key kaan par joon tak rengi? kisi bhee qanoon nafiz karney waley idarey ney koee notice liya ya is ki rok tham key liey kisi bhee qism key iqdamaat kiey? baharhaal agar kuch kiya bhee to hamein na pata chala na hee asraat nazar aaey keyoun key khoon kharaba usee tarah rawan dawan hey.
teesree baat qanoon nafiz karney waley idarey kuch karein bhee keyoun ?? kis liey? kon hey un ko poochney wala?
Siyasatdaan ? woh to khud in idaron ko apney mafad key liey awam mein dehshat gardi key liey istemaal kartey hein.
Adliya ???????????
Afsos woh khud apney liey Insaaf ki talash mein pichley saal sey sargardaan hey magar abhee tak koee shunwaee naheen hoee.... aur pata naheen kab hogee...... hogee bhee keh naheen ....
Aik cheez jo is sarey moamley sey wazeh hey keh awam mein frustration level kafee khatarnaak had tak pohonch gaya hey ...
pehley bhee tha magar ihtejaj mein awan sirf tyres jalatey they ya phir gariyan, motorcycle jaisee chezein ya phir zeyadah hua to dukanon ko aag lagatey they magar ab baat insanon ko zindah jalaney tak aa pohnchi hey, Allah reham karey yeh aasaar mujhey to kisi Khonee Inqilaab key nazar aarahey hein ....
Agar abhee awam key ghussey ko thanda karney key liey arbab-e-ikhtiyar aur arbab-e-iqtidaar ney kuch na keya to mujhey lagta hey keh awam key jo haath aaj chotey motey dakoo jala rahey hein kal ko barey logon ki gardanon tak bhee pohonch saktey hein.
Keya Pakistan , Iran, Russia ya France kee tarah key inqilaab ki taraf to naheen barh raha? keya tamam arbab-e-ikhtiyar aur arbab-e-iqtidaar apni taqat key nashey mein itney andhey ho chukey hein aur itney currept ho chukey hein keh un ko apney mafad key ilawah kuch nazar naheen aata? Mera naheen khayal keh is waqt manzar par jitney bhee siyasi rehnuma hein kisi ko bhee awam kee takaleef ka sahee andazah hey. Aur ho bhee kaisey sakta hey sarey hee to jaddi pushti aur bama ahl-o-ayaal Awam key rehnuma hein.
Aakhir mein merey liey sirf is dua key siwa kuch kehney ko naheen key Ya Allah ham par rehem farma, hum ko aur hamarey rehnumaon ko seedha raasta dikha aur Pakistan ki Hifazat farma aur hamein itnee himmat dey key hum apney deen, mulk aur qom ki hifazat aur khidmat kar sakein.(Ameen)
--MSA-20-05-2008--
Important note from webmaster: Due to some technical issue, we have lost the name of author, so our request to author, who sent this article to us, please give us your user name, so we can transfer this article to his name
|