Bay'qarar Lamhon Mein

Bay'qarar lamhon mein
sochti hun jab tum ko
Bay'khumaar aankhon mein
Khwab se sulaghtey hain

Janti hun mein janaan
Khwab hi ho tum lekin
Sa'toun ki laryon mein
kuch khushi pirooni hai!

Tishnagi ke aalam mein
kuch siraab piyason ko
Zindagi ke sehra mein 
jaam ban ke miltey hain.

Rut khizaan ki thehrey to
jhartey peelay pat'ton mein,
Ankhili si kalyon ke
rang bhi jhalaktey hain!

Maslehat ke pehrey mein
tum bhi sans laitey ho,
Hum bhi zeest kartey hain
dil se mavra ho kar!

Kon kis ko parkhey ga
Ulfaton mein jaan e jaan?
Zeest gar wafa karti
hum kahan miley hotey?

Phir bhi bay'khayali mein
hans ke ro diye jaanan
Soch kar najaaney kya
bay'qarar lamhon mein!