"Let there arise out of you a band of people inviting to all that is good enjoining
what is right and forbidding what is wrong; they are the ones to attain felicity".
(surah Al-Imran,ayat-104)
Latest Top 3
No Article has been posted in last 30 days
Views: 2566
Replies: 0
Share with Friend
Post Comment
|
جاپانی پارلیمنٹ میں نائن الیون کا پوسٹ مارٹم,,,,ثروت جمال اصمعی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نائن الیون کی تباہ کاریوں میں کس کا ہاتھ تھا؟ مسلمان ملکوں میں یہ بات اب عموماً زیر بحث نہیں آتی لیکن غیرمسلم ملکوں میں وقت گزرنے کے ساتھ ساتھ یہ آواز توانا ہوتی جارہی ہے کہ نائن الیون کے واقعے میں سب سے زیادہ مشتبہ کردار خود امریکی حکمرانوں اور خفیہ ایجنسیوں کا ہے اور اس کا الزام مسلمانوں پر کسی ثبوت کے بغیر تھوپ دیا گیا ہے۔ یہ آواز سب سے پہلے خود امریکا میں اٹھی اور امریکی محققین نے ثبوت و شواہد سے عاری سرکاری کہانی کے بخیے ادھیڑ کر رکھ دیے۔برطانیہ اور فرانس وغیرہ میں بھی اس حوالے سے نہایت قابل قدر کاوشیں سامنے آئیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔حال ہی میں اٹلی کے سابق صدر کوسیگا نے اپنے ملک کے سب سے بڑے اخبار کوریئر ڈیلا سیرا کو دیے گئے انٹرویو میں علی الاعلان کہا ہے کہ نائن الیون میں امریکی انتظامیہ اور خفیہ ایجنسیاں ملوث تھیں اور یہ کام اسرائیلی خفیہ تنظیم موساد اور صہیونی دنیا کے تعاون سے اس لیے کیا گیا تاکہ اس کا الزام مسلمانوں پر عائد کرکے افغانستان اور عراق پر فوج کشی کی جائے اور مغربی دنیا کو مسلم ملکوں کے وسائل پر تسلط کے مواقع مہیا کیے جائیں۔ یہ تمام تفصیلات قطعی مستند حوالوں کے ساتھ ان کالموں میں وقتاً فوقتاً پیش کی جاتی رہی ہیں۔اس ضمن میں تازہ ترین پیش رفت جاپانی پارلیمنٹ میں نائن الیون پر ایک نہایت چشم کشا مباحثے کی شکل میں منظر عام پر آئی ہے جسے جاپان کے سرکاری ٹی وی چینل این ایچ کے پر گزشتہ ہفتے براہ راست دکھایا گیا۔حقیقت یہ ہے کہ امریکا کے جاپان جیسے حلیف ملک میں نائن الیون کا یہ پوسٹ مارٹم اور اسے براہ راست پوری قوم کو دکھانا امریکی حکمرانوں کے لیے ایک بہت بڑا دھماکا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ انسداد دہشت گردی کے نعرے کی آڑ میں شروع کی گئی استعماری جنگ کی حقیقت کو عام کرنے کی یہ تحریک جو اب تک نجی کوششوں تک محدود تھی ،اس میں کسی ریاست کی شمولیت یقینا ایک انقلابی واقعہ ہے اور اس کے اثرات کو روکنا بہت مشکل ہے۔ اس پوری بحث کا ٹرانسکرپٹ ”ٹرتھ نیوز ڈاٹ یو ایس“ کی ویب سائٹ پر 18 جنوری کو جاری کی گئی بنجامن فل فورڈ کی رپورٹ میں شامل ہے۔ فل فورڈ جاپان میں مقیم کنیڈین صحافی ہیں۔قارئین قوسین میں دیے گئے ویب سائٹ ایڈریس پر یہ پوری روداد براہ راست پڑھ سکتے ہیں۔ (http://www. truthnews. us/?p=1705)۔ رپورٹ کے مطابق جاپانی پارلیمنٹ میں ڈیمو کریٹک پارٹی کے رکن Yukihisa Fujita اس بحث کا محرک بنے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔جاپانی پارلیمنٹ کی دفاع اور امور خارجہ کمیٹی کے اجلاس میں کمیٹی کے سربراہ نے انسداد دہشت گردی کے خصوصی قانون پربحث شروع کرتے ہوئے یوکی ہی سا فوتیجا کو گفتگو کی ابتداء کرنے کی دعوت دی، اور مسٹر فوتیجا یوں گویا ہوئے : ”یہ اس کمیٹی کا ٹی وی پر پیش کیا جانے والا آخری اجلاس ہے اس لیے میں دہشت گردی کے خلاف جنگ کے اصل سبب سے اپنی بات شروع کروں گا ۔“ انہوں نے اس حقیقت پر روشنی ڈالی کہ دہشت گردی کے خلاف جنگ کے نتیجے میں نیویارک سے کہیں زیادہ بڑی تعداد میں اور کہیں زیادہ معصوم لوگ افغانستان میں ہلاک ہوئے ہیں۔اس لیے دہشت گردی کے خلاف قانون سازی میں ہمیں یہ امر پیش نظر رکھنا چاہیے کہ ہماری اولین ترجیح افغانستان کے لوگوں کی مدد ہو۔ اس کے بعد انہوں نے ڈیمو کریٹک پارٹی ہی سے وابستہ کمیٹی کے ایک اہم رکن Tadashi Inuzuka کو اپنا موقف پیش کرنے کو کہا۔ اِنوزوکا نے فوتیجا کی اس بات سے اتقاق کیا کہ دہشت گردی کے خلاف جنگ میں سب سے زیادہ نقصان افغان عوام نے اٹھایا ہے اور جاپان کے انسداد دہشت گردی قانون کا بنیادی مقصد افغانستان کی سلامتی اور بہتری ہونا چاہیے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ انہوں نے کہا کہ دہشت گردی کے خلاف جنگ میں ہماری جانب سے امریکی ایئرفورس کو تیل کی فراہمی سے زیادہ ضروری افغان عوام کو پانی مہیا کرنا ہے۔ اس کے بعد فوتیجانے کہا کہ دہشت گردی جنگ نہیں بلکہ جرم ہے جبکہ اِس وار آن ٹیرر کا آغاز بنیادی طور پر نائن الیون سے ہوا ہے۔ انہوں نے کہا ”میں جاننا چاہتا ہوں کہ اس واقعے کا سبب القاعدہ تھی یا نہیں۔ حکومت کے پاس اس کا جواب بس اتنا ہے کہ ہم اس کا ذمہ دار القاعدہ کوسمجھتے ہیں کیونکہ صدر بش نے ہمیں یہی بتایا ہے۔ ہم نے کوئی ایسا حقیقی ثبوت نہیں دیکھا جس سے ثابت ہو کہ یہ القاعدہ ہی کا کام تھا۔ میں جاننا چاہوں گا کہ وزیر اعظم یہ کیوں سمجھتے ہیں کہ طالبان نائن الیون کے ذمہ دار ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ صدر مجلس! میں وزیر اعظم سے یہ بات پوچھنا چاہتا ہوں کیونکہ وہ اس وقت چیف کیبنٹ سیکریٹری تھے۔“ وزیر اعظم Fukuda نے جواباً کہا: ” حملوں کے بعد ہم امریکی حکومت اور دیگر حکومتوں سے مختلف سطحوں پر بات چیت اور اطلاعات کا تبادلہ کرتے رہے۔ ہماری حکومت کی حاصل کردہ خفیہ معلومات اور بیرونی حکومتوں سے ملنے والی رپورٹوں کے مطابق نائن الیون حملے بین الاقوامی دہشت گرد تنظیم القاعدہ نے منظم کیے تھے۔“ اس پر فوتیجا نے بات یوں آگے بڑھائی :”یعنی آپ خفیہ اور ظاہر کردہ دونوں طرح کی معلومات کی بات کررہے ہیں۔ اب میرا سوال یہ ہے کہ کیا جاپانی حکومت نے اپنی پولیس اور دیگر ذرائع کو استعمال کرتے ہوئے خود بھی کسی تحقیقات کا اہتمام کیا؟یہ ایک جرم تھا اس لیے تحقیقات کا اہتمام یقینی طور پر کیا جانا چاہیے تھا۔ جب میانمار میں ایک جاپانی صحافی مارا گیا تھا تو آپ نے تحقیقات کرائی تھی۔اسی طرح نائن الیون میں بیس سے زائد جاپانی مارے گئے، چنانچہ حکومت کو لازمی طور پر خود اپنی تحقیقات کراکے یہ فیصلہ کرنا چاہیے تھا کہ کیا اس کی ذمہ دار القاعدہ تھی۔اس لیے بتائیے کہ آپ نے کس قسم کی تحقیقات کرائی؟اس وقت آپ چیف کیبنٹ سیکریٹری تھے، اس لیے آپ یقینا یہ بات کسی بھی دوسرے شخص سے بہتر جانتے ہوں گے، لہٰذا میں آپ سے آپ کی تحقیقات کے بارے میں جاننا چاہتا ہوں۔“ اس پر وزیر اعظم فوکودا نے بتایا کہ ”نائن الیون حملوں کے بعد نیشنل پولیس ایجنسی نے ایک ایمرجنسی اینٹی ٹیرر ٹیم نیویارک بھیجی تھی۔ یہ لوگ امریکی حکام سے ملے اور انہوں نے لاپتہ جاپانیوں کے بارے میں معلومات جمع کیں۔“ وزیر اعظم کے اس جواب پر فاضل رکن پارلیمنٹ فوتیجا نے بحث کو نئے رخ پر لاتے ہوئے کہا ”گویا آپ کہہ رہے ہیں کہ ”بیس افراد ایک جرم کے نتیجے میں مرگئے اور ان میں سے بیشتر نیویارک میں کام کررہے تھے۔جبکہ کچھ جاپانی ان چار طیاروں میں بھی ہلاک ہوئے جنہیں اغواء کیا گیا تھا۔میں ٹھیک ٹھیک جاننا چاہوں گا کہ کتنے لوگ عمارتوں میں مرے اور کتنے جہازوں میں۔براہ کرم یہ بھی بتائیے کہ آپ نے اس کی تصدیق کیسے کی۔میں چاہوں گا کہ مجھے اس کا جواب وزیر خارجہ عنایت فرمائیں۔“ وزیر خارجہ Masahiko Komura نے بتایا کہ ”گیارہ ستمبر 2001ء کودہشت گرد حملوں کے نتیجے میں ہمیں ایک درجن سے زیادہ لاشیں ملیں۔امریکی حکام نے ہمیں گیارہ مزید اموات کی اطلاع بھی دی۔مجموعی طور پر 24جاپانی موت کا نشانہ بنے۔ ان میں سے دو جہازوں میں تھے۔“ فوتیجا نے اس پر ان جہازوں کے بارے میں جاننا چاہا جن میں یہ جاپانی سوار تھے ۔ انہوں نے یہ بھی دریافت کیا کہ ان کی پہچان کیسے ہوئی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔سیکریٹری خارجہ Ryoji Tanizaki نے اس کے جواب میں بتایا کہ ان جہازوں میں سے ایک یونائیٹڈ ایئرلائن فلائٹ 93 اور دوسری امریکن ایئرلائن فلائٹ 11 تھی جبکہ ان میں مرنے والے جاپانیوں کی تشخیص امریکی حکومت نے ڈی این اے ٹسٹ کے ذریعے کی تھی۔انہوں نے تسلیم کیا کہ اس بارے میں کوئی براہ راست دستاویزی معلومات جاپانی حکومت کے پاس نہیں ہیں۔اس پر فوتیجا نے کہا کہ” گویا آپ اس بارے میں براہ راست کچھ نہیں جانتے۔ آپ کے پاس کوئی دستاویزی معلومات نہیں ہیں اور ڈی این اے ٹسٹ کے بارے میں بھی آپ صرف امریکی حکومت کے کہنے کی بناء پر سمجھتے ہیں کہ ایسا ہوا ہوگا۔اس لیے میں آج جو کچھ کہنا چاہتا ہوں وہ یہ ہے کہ یہ ایک جرم تھا اور جرائم کی تفتیش کی جاتی ہے۔ متاثرہ خاندانوں کو اس تفتیش سے باخبر کرنا حکومت کی ذمہ داری ہوتی ہے۔مزید یہ کہ ہرسال نائن الیون کا محض دن منالینے کے بجائے آپ کو اس بارے میں معلومات جمع کرنی چاہئیں اور اس پر اپنا ردعمل ظاہر کرنا چاہیے۔ تو کیا پچھلے چھ برسوں میں آپ ہلاک ہونے والوں کے خاندانوں کو یہ معلومات فراہم کرتے رہے ہیں؟میں یہ بات وزیر خارجہ سے پوچھنا چاہوں گا۔“وزیر خارجہ نے بتایا کہ متاثرہ خاندانوں کو لاشوں کے بارے میں معلومات مہیا کی گئیں اور ان سے مالی تعاون کیا جاتا رہا ہے۔ بحث کو یہاں تک پہنچانے کے بعد یوکی ہی سا فوتیجا نے اپنے اصل موقف اور استدلال کو یوں بیان کیا: ” کیونکہ میرے پاس زیادہ وقت نہیں ہے، اس لیے میں نائن الیون کے واقعات کے حوالے سے ان مشتبہ معلومات کے بارے میں جو منظر عام پر آئی ہیں اور ان شکوک و شبہات کے بارے میں جن کا اظہار لوگ پوری دنیا میں کررہے ہیں، پوچھنا چاہوں گا۔ شک و شبہ کا اظہار کرنے والوں میں سے بہت سے نہایت بارسوخ لوگ ہیں۔میں سمجھتا ہوں کہ ان حالات میں جاپانی حکومت کو جو باور کرتی ہے کہ یہ حملے القاعدہ نے کرائے تھے، متاثرہ خاندانوں تک یہ نئی معلومات بھی پہنچانی چاہئیں۔ اس تعلق سے میں کئی سوالات کرنا چاہوں گا۔“
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ فوتیجا نے اپنی بات جاری رکھتے ہوئے کہا: ”سب سے پہلے میں کمیٹی کے تمام ارکان کو یہ تصاویر دکھانا چاہتا ہوں جو میں نے حاصل کی ہیں۔تصاویر اور دوسری معلومات کی صورت میں یہ ٹھوس ثبوت ہیں۔ پہلی تصویر کے ساتھ کمپیوٹر گرافکس بھی یہ دکھانے کے لیے منسلک ہیں کہ پنٹاگون سے ٹکرانے والا جہاز کتنا بڑا تھا۔ 757 جہاز کی چوڑائی38 میٹر ہوتی ہے۔ مگر آپ دیکھ سکتے ہیں کہ اتنا بڑا جہاز پنٹاگون سے ٹکرایا تاہم اس کی عمارت میں نسبتاً بہت چھوٹا ہول ہوا۔یہ تصویر ایک فائرمین کی کھینچی ہوئی ہے جو وہاں کام کررہا تھا۔آپ یہ بھی دیکھ سکتے ہیں کہ اتنا بڑاجہاز ٹکرانے سے جو تباہی ہونی چاہیے تھی وہ قطعی نہیں ہوئی۔اب اِس کے سامنے لان کو بھی دیکھئے، یہاں جہاز کا کوئی ٹکڑا نہیں ہے۔ اب تیسری تصویر دیکھئے۔یہ بھی پنٹاگون کی ہے اور ایک امریکی ٹی وی کی نیوز رپورٹ سے لی گئی ہے۔اس سے پتہ چلتا ہے کہ پنٹاگون کی چھت جہاز کی ٹکر کے باجود سلامت ہے۔اگر فرض کرلیا جائے کہ اتنا بڑا جہاز اس عمارت سے ٹکرایا تھا تو اس کے نتیجے میں ہونے والے نقصان کو بہرحال ا س سے کوئی نسبت نہیں ہے۔اب ہم اگلی تصویر دیکھتے ہیں۔ یہ عمارت میں ہونے والے ہول کی تصویر ہے۔منسٹر کومورا جانتے ہیں کہ پنٹاگون متعدد دیواروں والی انتہائی مضبوط عمارت ہے۔اس کے باوجود جہاز نے اس میں سوراخ کردیا۔لیکن آپ جانتے ہیں کہ طیارے حتی الامکان زیادہ سے زیادہ ہلکے میٹریل سے بنائے جاتے ہیں۔اتنے ہلکے میٹریل سے بنا ہوا جہاز ایسا سوراخ نہیں کرسکتا۔اس کے بعد میں آپ کو جو تصویر دکھا رہا ہوں اس سے پتہ چلتا ہے کہ جہاز بلڈنگ سے کس طرح ٹکرایا۔جہاز نے وزیر دفاع کے دفتر کو بچانے کے لیے ایک یوٹرن لیا اور پنٹاگون کے صرف اس حصے کو نشانہ بنایا جسے بمباری کا مقابلہ کرنے کے لیے خاص طور پر مضبوط بنایا گیا تھا۔“
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ فوتیجا نے اپنی بات جاری رکھتے ہوئے کمیٹی کے ارکان کو اپنی پیش کردہ دستاویز میں شامل امریکی ایئرفورس کے ایک افسر کا یہ تبصرہ بھی دکھایا کہ ”نائن الیون میں جو دو قسم کے طیارے استعمال کیے گئے، میں نے انہیں اڑایا ہے۔اور میں یہ بات نہیں مان سکتا کہ جو شخص پہلی بار ان جہازوں کو اڑا رہا ہوں وہ ایسی کارروائی کرسکتا ہے۔“فوتیجا نے مزید کہا کہ امریکیوں نے بیشتر جہازوں کے فلائٹ ریکارڈر بھی حاصل نہیں کیے۔ پنٹاگون میں 80سے زیادہ سیکوریٹی کیمرے لگے ہوئے تھے مگر ان کی تقریباً کوئی بھی تصویر جاری کرنے سے انکار کردیا گیا۔یہ انتہائی عجیب و غریب بات ہے کہ جہاز یا اس کے ملبے کی کوئی بھی تصویر دستیاب نہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جاپانی پارلیمنٹ کے رکن فوتیجا نے پنٹاگون کے بعد نیویارک کے ٹریڈ ٹاورز کا موضوع چھیڑتے ہوئے مختلف تصاویر اور دیگر مواد کمیٹی کے سامنے پیش کیا۔ انہوں نے طیاروں کے حملے کے بعد ٹریڈ ٹاورز کی عام طور پر دستیاب دو تصاویر میں عمارت سے کم و بیش ڈیڑھ سو میٹر کے فاصلے پر فضا میں اڑتے ہوئے میٹریل کی بنیاد پر کہا کہ یہ کیفیت کسی بم دھماکے ہی سے رونما ہوسکتی ہے، محض جہاز کے ٹکرانے سے ایسا ہونا ممکن نہیں۔انہوں نے ایک فائرمین کے انٹرویو کا ریکارڈ بھی پیش کیا جس کا کہنا تھا کہ اس نے مسلسل دھماکوں کی ایسی آوازیں سنیں جو پیشہ ورانہ انداز میں کسی عمارت کو منہدم کرنے کے لیے کیے جانے والے دھماکوں ہی سے ہوسکتی ہیں۔ فوتیجا نے ایک جاپانی ریسرچ ٹیم کی جانب سے ٹریڈ ٹاورز پر حملے کے وقت وہاں کام کرنے والی ایک جاپانی خاتون کے انٹرویو کا ریکارڈ بھی پیش کیا جس نے بتایا کہ جب وہ جان بچانے کے لیے بھاگ رہی تھی تو اس نے مسلسل دھماکوں کی آوازیں سنیں۔یہ ریسرچ ٹیم جاپان کے فائر ڈیپارٹمنٹ اور وزارت تعمیرات کے اہلکاروں پر مشتمل تھی۔ اس کے بعد فوتیجا نے کمیٹی کے ارکان کے سامنے ایک تصویر پیش کرتے ہوئے کہا کہ” عموماً کہا جاتا ہے کہ ٹوئن ٹاورز سے جہاز ٹکرائے تھے۔ مگر ٹوئن ٹاورز سے ایک بلاک آگے بلڈنگ نمبر سات ہے۔نقشے میں اسے ورلڈ ٹریڈ سنٹر سے ایک بلاک آگے دیکھا جاسکتا ہے۔یہ عمارت ٹوئن ٹاورز پر حملے کے سات گھنٹے بعد منہدم ہوئی۔اگر میں آپ کو ویڈیو دکھاسکتا تو سمجھنا آسان ہوتا مگر ایک نگاہ اس تصویر پر ڈالیے۔یہ ایک 47 منزلہ عمارت تھی جو پانچ چھ سیکنڈ میں بیٹھ گئی۔یہ تقریباً وہی رفتار ہے جس سے بلندی سے زمین پر گرائی جانے والی کوئی چیز گرتی ہے … جبکہ اس عمارت سے کوئی جہاز نہیں ٹکرایا تھا۔ آپ کو اپنے آپ سے پوچھنا چاہیے کہ کیا کوئی عمارت آگ لگنے کی وجہ سے سات گھنٹے بعد اس طرح ڈھیر ہوسکتی ہے۔“ اس کے بعد فوتیجا نے امریکی حکمرانوں کی بدنیتی اور حقائق چھپائے جانے کی کوششوں کا ایک اور انتہائی یقینی ثبوت پیش کیا۔ انہوں نے ایک کتاب کو لہراتے ہوئے کہا ” یہاں ہمارے پاس نائن الیون کمیشن رپورٹ کی ایک کاپی ہے۔یہ رپورٹ امریکی حکومت کی طرف سے جولائی 2004ء میں پیش کی گئی تھی لیکن اِس میں اُس عمارت کے گرنے کا کوئی ذکر نہیں جس کے متعلق میں نے ابھی آپ کو بتایاہے۔ بہت سے لوگ بلڈنگ نمبر سات کی روداد سامنے آجانے کے بعد خاص طور پر سمجھتے ہیں کہ یہ معاملہ پراسرار ہے اس لیے اس کی تحقیقات ہونی چاہیے۔“
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ اس مرحلے تک پہنچنے کے بعد فوتیجا نے مالیاتی حوالے سے نائن الیون کے ایک اور نہایت اہم پہلو کی نشاندہی کی ۔ انہوں نے بتایا کہ گیارہ ستمبر کے واقعات سے عین پہلے چھ سات اور آٹھ ستمبر کو یونائیٹڈ اور امریکن ایئر لائنوں یعنی ان دونوں فضائی کمپنیوں کے شیئرز متعین قیمت کے عوض بہت بڑی تعداد میں فروخت کیے گئے جن کے جہاز نائن الیون حملوں میں استعمال ہوئے۔اسی طرح ورلڈ ٹریڈ سنٹر کے سب سے بڑے کرایہ داروں میں سے ایک Merril Lynch کے شیئرز بھی ان تاریخوں میں بڑے پیمانے پر متعین قیمت پر فروخت کیے گئے۔ فوتیجا نے بتایا کہ جرمنی کے مرکزی بینک ( Bundesbank ) کے اس وقت کے سربراہ نے کہا تھا کہ یہ بات ثابت کرنے کے لیے بڑی تعداد میں حقائق موجود ہیں کہ جو لوگ ان دہشت گرد حملوں میں ملوث تھے انہوں نے اندرونی معلومات کی بنیاد پر بھاری منافع کمایا۔انہوں نے کہا تھا کہ حملوں سے پہلے مالیاتی اور دیگر کمپنیوں کی طرف سے بہت بڑے پیمانے پر مشتبہ کاروبار ہوا۔اس کے بعد فوتیجا نے کہا کہ میں وزیر مالیات سے جاننا چاہتا ہوں کہ کیا حکومت جاپان کو ان باتوں کا علم ہے اور خود وہ اس بارے میں کیا کہتے ہیں۔وزیر مالیات نے اپنے جواب سے یہ تاثر دیا گویا اس مشتبہ کاروبار میں بھی مبینہ دہشت گرد حملہ آورہی ملوث تھے۔اس پر فوتیجا نے اجلاس میں موجود ماہر مالیات مسٹر Asao سے پوچھا کہ وہ اس مشتبہ کاروبار کے بارے میں کیا رائے رکھتے ہیں۔کیا اس کے لیے لوگوں کے ایک ایسے گروہ کی موجودگی ضروری نہیں تھی جو بھاری رقم بھی رکھتا ہو اور جس کے پاس اندرونی معلومات اور مالیاتی مہارت بھی ہو۔ کیا پاکستان اور افغانستان میں موجود چند دہشت گرد ایسا پیچیدہ کاروبار اتنے بڑے پیمانے پر کرسکتے تھے؟ ماہر مالیات آساوٴ نے دوٹوک الفاظ میں کہا کہ یہ کاروبار اندرونی معلومات اور اندر کے لوگوں کی شرکت کے بغیر کسی صورت نہیں ہوسکتا تھا کیونکہ کوئی بھی یہ اندازہ نہیں لگا سکتا تھا کہ ان کمپنیوں کے جہاز اغواء ہونے والے ہیں۔ ماہر مالیات کے اس جواب کے بعد فوتیجا نے وزیر اعظم جاپان کو مخاطب کرتے ہوئے کہا ” آپ اس وقت چیف کیبنٹ سیکریٹری تھے اور ایک عام آدمی نے بھی محسوس کیا تھا کہ انسانیت کو اس قسم کے واقعے کا پہلے کبھی کوئی تجربہ نہیں ہوا۔اس واقعے کے چند ماہ بعد ہی سے اس بارے میں ایسی معلومات کے منظرعام پر آنے کا سلسلہ شروع ہوچکا ہے جن کی روشنی میں یہ معاملہ مشتبہ نظر آتا ہے۔ یہ انٹرنیٹ اور اطلاعات کی فوری ترسیل کا دور ہے چنانچہ یہ معلومات ان ذرائع سے عام ہوتی رہی ہیں۔ میں نے آپ کو ابھی جو کچھ بتایا ،اس سے پتہ چلتا ہے کہ دہشت گردی کے خلاف جنگ نائن الیون کے جس واقعے کی بنیاد پر شروع کی گئی،اس کی کوئی اطمینان بخش تحقیقات نہیں کی گئی۔میں نہیں سمجھتا کہ حکومت جاپان نے اس واقعے کی تحقیقات کے لیے خود کوئی مناسب کارروائی کی ہے یا امریکی حکومت سے اس ضمن میں اس کی جانب سے کوئی وضاحت طلب کی گئی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔اس لیے میں سمجھتا ہوں کہ ہمیں اب بات ابتداء سے شروع کرنی چاہیے اور امریکی حکومت کی وضاحتوں اور بالواسطہ مہیا کردہ اطلاعات کو آنکھیں بند کرکے تسلیم نہیں کرنا چاہیے۔ہمیں پوچھنا چاہیے کہ اس وار آن ٹیرر کا اصل شکار کون لوگ ہیں۔ میں سمجھتا ہوں کہ پوری دنیا کے عوام اس کا ہدف بنے ہیں۔میں نے آپ کے سامنے ہر چیز حقائق اور یقینی شواہد کی بنیاد پر پیش کی ہے۔آپ غائب ہوجانے والے بلیک باکسز، لاپتہ ہوجانے والے جہازوں اور ان کی معدوم ہوجانے والی باقیات کے بارے میں بھی جانتے ہیں۔تباہ ہوجانے والی عمارتوں کے ملبے کے پہاڑ بھی غائب ہوگئے۔حتیٰ کہ FEMA( امریکا کی فیڈرل ایمرجنسی مینجمنٹ ایجنسی)کا کہنا ہے کہ اسے بھی مناسب تحقیقات سے روکا گیا۔ہمیں ان ثبوت و شواہد کے سامنے آجانے کے بعد اپنے آپ سے سوال کرنا چاہیے کہ وار آن ٹیررازم حقیقت میں ہے کیا۔“ فوتیجا نے اپنی بات جاری رکھتے ہوئے کہا ”میں دیکھ رہا ہوں کہ وزراء میری تائید میں سرہلارہے ہیں مگر میں وزیر اعظم فوکودا سے پوچھنا چاہتا ہوں۔ براہ کرم میری طرف دیکھئے۔میں نے سنا ہے کہ جب آپ چیف کیبنٹ منسٹر تھے تو آپ نے ان حملوں کے حوالے سے کئی عجیب باتیں محسوس کی تھیں۔کیا آپ نہیں سمجھتے کہ یہ ایک عجیب اور مشتبہ معاملہ تھا؟“ …
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ وزیر اعظم فوکودا اس انتہائی مدلل گفتگو کے جواب میں صرف اتنا کہہ کر خاموش ہوگئے کہ”میں نے کبھی نہیں کہا کہ یہ کوئی عجیب معاملہ تھا۔“… تاہم فوتیجا نے اپنی جرح جاری رکھی اور بولے ”وزیر اعظم، وار آن ٹیرر کی اصلیت، اس کے صحیح یا غلط ہونے اور اس میں شرکت کرنے کے بارے میں آپ کا کیا خیال ہے؟کیا اس وار آن ٹیرر میں شرکت کا کوئی حقیقی جواز ہے؟کیا ہمیں اس میں حصہ لینے کی واقعی کوئی ضرورت ہے؟میں یہ بھی جانناچاہوں گا دہشت گردی کو روکنے کے لیے حقیقتاً کیا کرنا چاہیے۔“ … وزیر اعظم فوکودا نے ان سوالات کے جواب میں حکومت کی پالیسی کا اعادہ کرتے ہوئے کہا کہ ”امریکی حکومت کے فراہم کردہ شواہد کی بنیاد پر ہم سمجھتے ہیں کہ نائن الیون حملے القاعدہ نے کرائے تھے۔ القاعدہ کی دہشت گردی کو ختم کرنا ہمارے لیے ضروری ہے۔یہی وجہ ہے کہ بین الاقوامی سوسائٹی دہشت گردی کے خلاف جنگ میں متحد ہے۔ڈیموکریٹک پارٹی نے گزشتہ سال اقوام متحدہ کی قرارداد 16595کی بنیاد پر ایک قانون کی منظوری دی تھی۔ یہ قرارداد امریکا پر ہونے والے دہشت گرد حملوں سے متعلق ہے۔اس لیے آپ نے اقوام متحدہ سے اتفاق کرتے ہوئے یہ قانون منظور کیا تھا۔ کیا آپ نے ایسا نہیں کیا؟“ … اس کے جواب میں فوتیجا نے وزیر اعظم سے پوچھا ”کیا آپ نے اقوام متحدہ کی اس قرارداد کی بنیاد بننے والے حقائق کی تصدیق کرلی ہے جن کی وجہ سے آپ کا دعویٰ ہے کہ اس وار آن ٹیرر میں شرکت کرنی چاہیے۔(چونکہ ایسا نہیں ہوا) اس لیے میں سمجھتا ہوں کہ دہشت گردی ختم کرنے کے لیے ہمیں ایک ایسا قانون بنانا چاہیے جو عملی طور پر افغانستان کے لوگوں کی مدد کا باعث بنے۔“ اس کے بعد انہوں نے تاداشی اِنوزوکاسے اس موضوع پر بات آگے بڑھانے کی درخواست کی۔اور انوزوکا نے تیس منٹ کے اس اجلاس کا اختتام ان الفاظ پر کیا: ” ممبر پارلیمنٹ فوتیجا نے جن مسائل کا ذکر کیا ہے ان میں ہمیں سب سے زیادہ جس بات کی فکر ہونی چاہیے وہ یہ ہے کہ افغانستان کے لوگ امن کے ساتھ اور پریشانیوں سے محفوظ رہتے ہوئے زندگی بسر کرسکیں۔دہشت گردی کے خاتمے کے لیے یہ بنیادی ضرورت ہے۔ محض تیل کی فراہمی جاری رکھ کر ، تمام صورت حال اور ان لوگوں کے حالات پر غور کیے بغیر جو ان کا شکار ہیں،اس قانون پر بحث کرنا فضول ہے۔یہ قانون افغانستان میں امن اور اس کی سلامتی کے لیے بنایا جانا چاہیے۔ہمارے ملک کو حقیقی معنوں میں انسداد دہشت گردی کے لیے قانون وضع کرنا چاہیے۔“ بنجامن فل فورڈ کی رپورٹ میں بتایا گیا ہے کہ اس کارروائی کے جاپان کے سرکاری ٹی وی چینل پر نشر ہونے کے بعد مسٹر فوتیجا کو بہت بڑی تعداد میں جاپانی پارلیمنٹ کے دوسرے ارکان کی طرف سے فون ملے جن میں جاپانی پارلیمنٹ میں اس جرأت کے ساتھ نائن الیون کے حقائق سامنے لانے پر ان کا شکریہ ادا کیا گیا، جبکہ اس پروگرام کے بعد انہیں موت کے گھاٹ اتاردینے کی دھمکی بھی موصول ہوئی۔خود بنجامن فل فورڈ نے جاپان کے بیرونی نامہ نگاروں کے کلب سے فوتیجا کی پریس کانفرنس کا اہتمام کرنے کے لیے کہا لیکن اس کے نتیجے میں ان کا ای میل اکاوٴنٹ منجمد اور ان کا کمپیوٹر کریش ہوگیا۔ فل فورڈ کا کہنا ہے کہ امریکی حکومت کے حامی صحافی اس پریس کانفرنس کو رکوانے کی ہر ممکن کوشش کررہے ہیں مگر دنیا کے باقی ملکوں کے نامہ نگار اس کے انعقاد کے حامی ہیں ۔ اس لیے وہ اور ان کے ساتھی کوشش کررہے ہیں کہ یہ پریس کانفرنس جلد سے جلد بلائی جاسکے۔فل فورڈ کی رپورٹ کے مطابق نائن الیون کے حوالے سے ذرائع ابلاغ پر حکومت جاپان کا خفیہ کنٹرول ختم ہورہا ہے۔چنانچہ چند ہفتے پہلے جاپان کے ایک بڑے کمرشل ٹی وی چینل نے اپنے پرائم ٹائم میں نائن الیون ٹرتھ پروگرام پیش کیا تھا۔ بلاشبہ جاپانی قوم کے رویے سے پتہ چلتا ہے کہ اس نے نائن الیون کے نام پر پوری دنیا کے لوگوں کو دیے گئے فریب کا پردہ چاک کرنے کا تہیہ کرلیا ہے ۔ مسلم دنیا کے حکمرانوں، سیاسی رہنماوٴں اور فریب خوردہ دانشوروں کو کم ازکم اب تو ہوش کے ناخن لینے چاہئیں اور انسداددہشت گردی کے جعلی نعرے کی آڑ میں شروع کی گئی امریکی و صہیونی مفادات کی جنگ میں ان کا مزید آلہٴ کار بنے رہنے سے انکار کردینا چاہیے۔
|
|
No replies/comments found for this voice
|